شاعر مغمور

مغمور ولالي معجبين وجماهير
محدود وضيق بالنطاق ومجاله

فقير واملك راس مال الهوامير
ما ارغب اتاجر في رصيدي وماله

ما ابيع واشري في شعور وتعابير
واحساس فطرة من عظيم الجلالة

قنوع ولا اقبل بالشعر اي تسعيير
لان المشاعر ملك ذات وحلاله

خلطة بنات افكار موقف وتحظير
نظرة قرين وصاغ فيها الجزالة

يعني ما جاب الشعر صفنة وتفكير
وان كان ينقل عرق بين السلالة

شفرة مشاعر تشفر بزود تشفير
شفرة وتصعب فكها في سهالة

يشبه جنوني باختلاف المعايير
يصبح ذهانة والذكاء له دلالة

رحت ورجعت ولاحصل اي تغيير
وان كان غيري الله اعلم بحاله

راعي محل وصرت مثل المسايير
عنده ولا ادري وشهو صار وجراله

سالم رجعت وصرت بالموقف الزير
راجع يدور شي مبطي سعاله

كانه ينازل ثار دمه مع الغير
انا بثارن لجل حبي نزاله

وان كان حربه ساس ناقة مع بعير
وجبير اصبح ثار شسعة نعاله

اجل شسوي لجل سيد الغنادير
ما راح بقبل لو هو مية بداله

لوجن قلبي هالعذارى طوابير
البيض يمنا والسمر في شماله

نجوم وجنب الشمس تطفي ولا تنير
منهو بمثله شمس ويعكس ضلاله

كذا رجوعي كان غاية وتبرير
جدال حب وجيت ابنهي جداله

ارمي بدلو اشواق حبي على البير
مشتاق وحبل البير يرسل وصاله

جيت متولع حب حشمة وتقدير
جيت متلهف فيك وعندي رسالة

موقف غياب وشرح فيه المعاذير
والبعد مات وعمر حبك حياله

رجعت اجدد ما تركته على خير
راجع وادور منهو قلبي صفاله

رجعت وفيني من خيالك وتصوير
ياليت تطبق معك صورة خياله

رجعة تترجم من رواية إلشكس بير
وانسج خيال الفكر والي وحاله

باحداث موعد معك لمحة وتأثير
والي شكاه القلب والي شقاله

رجعت لاخر جزء رافض لتأخير
حلقة تدور بفكر عاشق وباله

حس وتفلسف منه رايق تصاوير
لذا بقلبك شي وبعرف مناله

فرصة اخيرة دون خيرة وتخيير
اما جميع واما كلن لحاله

ان ماتبيني شي عادي ولا يضير
ولا هو بأول صعب ساقي رقاله

لانك وحيدة مافي غيرك جماهير
ولا المدرج راح يضحك لحاله

مغمور وياما بالقصايد مغامير
يبقالي راس المال شعر وجزالة