ثقل الحظارة

ثقيل وثقلي ماهو دمن وطينة
ثقيل خلق وعقل و ثقل بمساره

خفيف ولكن ماهو خفن تبينه
خفيف روح وظل وخفة زيارة

بليد ولكن لي بلادة فطينة
تكمن بلب الفكر قبل الاشارة

عبيط واملك لي عباطة ذهينة
تخفي وتظهر كل رمعة بمداره

بخيل وراع الوصف ما اكرم يمينه
كريم وراع الفعل بالدس شعاره

مغرور وذنبه كل تواضع يدينه
لذا غرور الذات اصبح شطارة

حزين وحزني من جناب الحزينه
لذا سروري صار حكم ادخاره

طويل ولكن طول بال وغبينة
طويل ويقصر في ضروف انتظاره

حليم وابغى الحلم بي تحذرينه
للفعل ردة فعل تشعل شراره

والشوك عكس الورد يوم تخطينه
فرق الخطاوي عن يمين ويساره

والحلو غير المر ذوقك يبينه
لاشك حلو الذوق ماهو مرارة

والدمع نفس الدمع تبكيه عينه
والفرق فرحة ولاحزن انهماره

والصبر واحد للصبور و آنينه
تصبر وتفرق يوم تقطف ثماره

والعمر كلن عاش فترة سنينه
احدن يعيشه فود واحدن خسارة

والموت كله موت ياتي بحينه
تفرق بحال الموت وقت احتظاره

والوقت نفس الوقت زينه وشينه
والزين يصبح شين وقت انحداره

زينة حظارة وقت في وقت زينه
وان شان وقت الزين شانت حظارة

كلن وله اسلوب ادرك يقينه
ولا هو اي اسلوب سهل ابتكاره

اسلوب وصعبة في عجل تفهمينه
به يتوسع كل خيال بمداره

مني وفيني منهجن تدركينه
منهج رسمته ماقبلت استعارة

حر التصرف في فعايل يدينه
ولا اتحكم في وقوفه اشارة

لني خصيم النفس ونفسي امينه
تعرف لغيري حد حر بمداره

عودن وصعبه لو نحل تكسرينه
قبلك زماني ما ظفر بانكساره

مهما ادعيتي في غروري وشينه
وجهة نظرك ولا تسبب اثارة

اثقل بخفي قدر نسبة رزينه
وان خف راعي ثقل يفقد وقاره