فترة قصيرة

حبك بقلبي عاش فترة قصيرة
لكن وصالك كان الاقصر بعمره

مسرع ووصلك عني أعلن مسيره
جيتي بصدن منتهي فيك امره

هذا إختيارك عله يكون خيرة
الله يحفظك ويحفظ الحب وسره

وإذا تبدل حب قلبي بغيره
جعله بديل)ن( منه تلقى مسرة

ايام وبانسى شر حبك و خيره
والحب مابه خير لا زاد شره

بعدك ما يعني لي حلقه أخيرة
فتره وتمحى من حياتي بفترة

فتره أبنسى كل طاري وسيرة
فتره وذكرك ينعدم في ذكره

أسهر وعيني ماهي لجلك سهيرة
من عاف حتى حسرتي فيه حسرة

ما دام صرنا كل منا بمصيره
كل)ن( وكيفه وإنتي حرة وحرة

والصد يفرض صدي بدون حيرة
إلا إذا إنك مانتي للصد مصرة

إلا إذا إنك راجعه مستخيرة
لامن شريتي حلو قربي ومره

تلقين قلبي فيه لهفة وغيرة
والشوق باقي مشعلن فيه جمرة

تطول فترة حب كانت قصيرة
لاطال وصلك طال حبك و عمره