ذكرياتي

راحت ليال العام وجتنا جديدة
ماباقي الا ذكرياتي من العام

وان جيت ابذكر فيها ذكرى سعيدة
ما به سعادة تنذكر ضمن الايام

ماغير ذاك الحزن يطري واعيده
حزن و بناله داخلي بيت واخيام

احزان تبعد عام ولا هي بعيدة
ترجع لموطن حققت بارضه احلام

يبقى حنين الدار فيها وتعيده
ترجع لقلبن اسكنت به من اعوام

قلبن هموم الوقت تعشق وريده
ما الوم كبدن ساسه الهم لا حام

العام تلو العام هذي الاكيدة
وان كان الآكد حزن وسبب لي آلام

راحت هموم العام وجتنا جديدة
وهموم العن من همومي هكا العام